早排同公司同事食中秋飯，十幾條友唔理限聚令，膽粗粗食雞煲。食到七七八八，無無聊聊就有人提議玩啲小遊戲。每個人輪流問個關於生活習慣嘅是非題，譬如「你沖涼嗰陣會唔會順便屙埋尿」，跟住數三聲，答「會」嘅就舉手，然後少數嗰邊就罰飲酒。

　　個遊戲初衷就係要大家提出自以為「我係大多數」嘅問題，然後驗證吓理想同現實差幾遠。最盞鬼嘅係，你永遠唔知自己幾時會做咗少數人。諗住裝某幾個勤力嘅同事彈弓，問「你會唔會放假都check公司email」，點知數完三聲，頂你個肺，得兩三個人唔舉手，乜原來大家有咁勤力咩？

　　問完一round之後，張枱多咗四枝空嘅青島酒樽，仲有五六個紅都臉晒嘅同事。有人飲多有人飲少，但每個人都至少做過兩三次少數族群。

　　上天係公平嘅，每個人都會有幾樣與眾不同嘅特質，唔存在咩都好一般既「一般人」；唔公平嘅係，有啲特質無傷大雅，就算係，都可以遷就，可以入鄉隨俗；有啲特質卻係與生俱來，俗啲講句係「首抽抽返嚟嘅」，如果個社會唔包容，咁當事人只能夠窮盡一生去承受同彌補。

　　當各位無可避免被歸類做弱勢社群嘅時候，你又會點處理呢？我見過既好多做法，就係將呢份歧視繼續延伸落去。如果異性戀歧視同性戀，咁同性戀就去歧視更非主流嘅同志：大隻靚仔恥笑樣貌身材平凡嘅人；單一配偶嘅情侶睇唔起多元關係嘅「玩家」咁「淫亂」；「正常」嘅hehe批評實踐BDSM嘅hehe惡心（君不見前排女同志狀告男人扮les性侵嘅新聞，留言處幾多人聚焦咗落去SM嘅部分）。就算係gay BDSM圈，諗住已經係少數中嘅少數，冇得再分化喇掛？唔好意思，BDSM都有分主流都冇咁主流嘅項目，「大眾」玩法嘅圈子會排斥小眾玩法嘅圈子……只可以講句，有人類就有是非，有比較就有傷害。

　　因為自己不幸，所以就要令其他人更加不幸；因為自己弱勢，所以就要去欺壓更弱勢嘅族群。作為一個中意小眾BDSM興趣嘅hehe，雖然仲未係成條「食物鏈」嘅最底層，但我又可以點呢？我點先可以說服自己唔去畫一塊高地，企喺上面指住更弱勢嘅人個鼻恥笑，將呢條苦痛枷鎖傳遞落去呢？

　　我都唔知。與其話係出於良心發現而選擇寬容，倒不如話單純係無能為力。可能喺另一個同性戀做霸權嘅平行世界，我都會𩓥高個頭批評班直男直女搞亂個社會。但願唔會。

　　其實我好唔想講類似「嗱，由今日開始，大家就要識做，學習同尊重身邊每一個人嘅獨特價值喇」呢啲中學生攞嚟打飛機攝字數嘅無聊建議。咁複雜嘅問題我真係唔識畀建議。如果唔需要時刻警醒，時刻勿忘初心，如果有個英雄勇者幫我做晒所有抗爭，衝過所有苦難，不問報酬咁幫我拎返應有嘅權利就好喇。我一路奉公守法甘心做順民，就係為咗有朝一日呢位天外救星憑空降世嘅時候，我能夠給予佢最需要嘅精神上支持，一定係咁。

　　講返當晚中秋飲酒。我哋有個特別緊張嘅同事，好多次主持人出完問題之後，都會不停要求釐清定義︰沖涼屙尿係有時會做有時唔做咁點計先？朝早沖先會屙夜晚沖就唔屙又點計先？

　　我好多時都答返同一個句「你自己心照啦」。屬唔屬於某一個族群，唔使考牌，唔使化驗，唔使揸住本教科書逐條check定義。如果唔需要驚輸咗要飲酒，如果冇任何群眾壓力，單純問心嗰句，你會唔會舉手話自己係（或唔係）先？

　　然後我哋就睇住個同事樣衰衰噉舉手舉咗去少數嗰邊，有時候都真係忍唔住笑。

　　「笑咩笑，其實你都係少數人咋。」

　　咁你又講得啱嘅。